NOS VISHON
PA KÒRSOU
proposito di e trayektoria aki
E futuro di Kòrsou ta kuminsá ku un soño. Un soño ku ta reflehá kon nos ke traha, siña i biba huntu riba nos isla. For di e pensamentu aki UN SOÑO, UN VISHON; ku amor pa é futuro di NOS Kòrsou a ser lansá: un kampaña nashonal di partisipashon ku ta invitá habitantenan pa kontribuí aktivamente na e futuro di Kòrsou.
Tin 1 pregunta fundamental:
Kiko ta bo soño
pa kòrsou?
UN SOÑO, UN VISHON ta forma parti di e trayekto nashonal pa desaroyo di un vishon di largo plaso pa Kòrsou. E trayekto aki ta wòrdu ehekutá riba enkargo di Ministerio di Asuntunan General na nòmber di Gobiernu di Kòrsou. Koordinashon di e trayekto di vision ta den man di SOAB (Stichting Overheidsaccountantsbureau), mientras ku SRDI (Strategic Results & Development Institute) ta responsabel pa ehekushon i guia di e proseso di partisipashon.
E meta final ta pa desaroyá un vishon di futuro ku ta wòrdu sostené dor di komunidat i ku ta guia e direkshon pa desaroyo di Kòrsou den e próksimo dékadanan.
Un vishon ku no solamente lo duna direkshon na maneho i desaroyo, pero ku ta derivá primordialmente for di e soñonan, balornan, ambishonnan i eksperensianan di e hendenan ku ta forma Kòrsou tur dia.
VIDEO
Kòrsou ta enfrentá ku retonan sosial i ekonómiko importante. Na mes momentu, nos isla tin un fortalesa enorme: e konosementu, kreatividat, resiliensia i kompromiso di su hendenan. Un vishon di futuro ta solamente risibí nifikashon berdadero ora hende por mira nan mes bèk den esaki.
Pa medio di enkuesta, gruponan di enfoke, bishitanan na skol, diálogonan, eventonan i plataformanan digital, habitantenan ta haña e oportunidat pa kontribuí aktivamente na e Kòrsou di mañan. Hóbennan i hendenan grandi, empresarionan i studiantenan, profeshonalnan, organisashonnan sosial, i miembronan di e diáspora ta ser invitá pa kompartí nan ideanan, eksperensianan i soñonan. Pasobra e futuro di Kòrsou por wòrdu formá solamente ora logra skucha mas tantu perspektiva ku ta posibel.
